भगूर शहराच्या विकासाला गती: कुंभमेळ्याचा निधी न मिळूनही भगूर नगर परिषदेकडून ५८.९५ लाखांची विकासकामे मंजूर; नगराध्यक्ष प्रेरणा बलकवडे यांच्या प्रयत्नांना यश
प्रतिनिधी | भगूर
स्वातंत्र्यवीर विनायक दामोदर सावरकर यांची जन्मभूमी असलेल्या ऐतिहासिक भगूर शहराच्या सर्वांगीण विकासासाठी भगूर नगर परिषदेने महत्त्वपूर्ण पाऊल उचलले आहे. नगर परिषदेच्या नगराध्यक्षा सौ. प्रेरणा विशाल बलकवडे यांच्या सातत्यपूर्ण पाठपुराव्याला आणि प्रयत्नांना यश आले असून शहरातील दोन अत्यंत महत्त्वाच्या विकासकामांसाठी ५८ लाख ९५ हजार ९९७ रुपयांचा निधी मंजूर करण्यात आला आहे.
मंजूर झालेला निधी व विकासकामे:
१. मारवाडी गल्ली रस्ता काँक्रिटीकरण व ड्रेनेज काम: ४७,१७,४९७ रुपये.
२. आठवडे बाजार ते नमो उद्यान रस्ता पेव्हर ब्लॉक व सुशोभीकरण: ११,७८,५०० रुपये.
पर्यटनाच्या दृष्टीने रस्त्यांचे कायापालट
आगामी सिंहस्थ कुंभमेळ्याच्या पार्श्वभूमीवर भगूर शहरात देश-विदेशातील पर्यटकांची संख्या मोठ्या प्रमाणात वाढण्याची शक्यता आहे. स्वातंत्र्यवीर सावरकर यांच्या सावरकर वाड्याला भेट देण्यासाठी येणाऱ्या पर्यटकांसाठी 'मारवाडी गल्ली' हा मुख्य आणि महत्त्वाचा मार्ग आहे. या रस्त्याची दुरवस्था दूर करून तेथे मजबूत काँक्रिटीकरण, योग्य ड्रेनेज व्यवस्था आणि परिसर सुशोभीकरणाचे काम हाती घेतले जाणार आहे.
तसेच, आठवडे बाजार ते नमो उद्यानाकडे जाणाऱ्या मार्गावर पेव्हर ब्लॉक बसवणे, वृक्षारोपण करणे आणि आकर्षक पथदीप (स्ट्रीट लाईट्स) लावणे यांसारखी कामे केली जातील. यामुळे हा परिसर सुंदर, स्वच्छ आणि प्रकाशमय होऊन नागरिक व पर्यटकांसाठी अधिक सोयीस्कर ठरणार आहे.
कुंभमेळा निधीअभावीही स्व-निधीतून विकासाचा मार्ग
नाशिकमध्ये होणाऱ्या सिंहस्थ कुंभमेळ्याच्या निमित्ताने भगूरमध्ये भाविक व पर्यटकांची मोठी गर्दी होणार असली, तरी अद्याप कुंभमेळा नियोजनातून भगूर शहराला कोणताही निधी प्राप्त झालेला नाही. मात्र, निधीअभावी शहराच्या विकासाला खीळ बसू नये आणि पायाभूत सुविधा वेळेत उभारल्या जाव्यात, यासाठी भगूर नगर परिषदेने स्वतःच्या 'विशेष रस्ता निधी'मधून ही विकासकामे मार्गी लावण्याचा निर्णय घेतला आहे.
नगराध्यक्षा प्रेरणा विशाल बलकवडे यांचे वक्तव्य:
"कुंभमेळ्याच्या ध्वजारोहण प्रसंगी माननीय राष्ट्रपती महोदयांनी व्यासपीठावरून स्वातंत्र्यवीर सावरकरांचा अत्यंत आदराने उल्लेख केला, ही संपूर्ण भगूरवासीयांसाठी अत्यंत अभिमानाची गोष्ट आहे. मात्र, त्याच वीर सावरकरांच्या जन्मभूमीचा प्रत्यक्ष कुंभमेळा नियोजनात आणि निधी वाटपात विचार झालेला नाही, ही अतिशय खेदाची बाब आहे.
कुंभमेळ्याच्या निमित्ताने नाशिक जिल्ह्यात एवढा मोठा सोहळा होत असताना आणि भगूरमध्ये पर्यटकांची संख्या वाढणार असताना, या ऐतिहासिक शहराकडे दुर्लक्ष होणे दुर्दैवी आहे. तरीही नगर परिषद स्वतःच्या निधीतून शहराच्या विकासाची जबाबदारी पूर्ण ताकदीने पार पाडत आहे. भगूरला एक सुंदर, स्वच्छ आणि सुसज्ज पर्यटनस्थळ बनवण्यासाठी आमचे प्रयत्न सातत्याने सुरूच राहतील."