सांगली जिल्हा संघर्ष समितीच्या वतीने भव्य सोहळा; शैक्षणिक, व्यावसायिक आणि सामाजिक कार्याचा गौरव
सांगली, दि. ३१ (प्रतिनिधी) : वास्तुकला, अभियांत्रिकी, कायदा, शिक्षण, संशोधन आणि सामाजिक क्षेत्रात उल्लेखनीय योगदान देणारे वास्तुविशारद डॉ. रविंद्र महादेव चव्हाण यांचा सांगली जिल्हा संघर्ष समितीच्या वतीने शुक्रवारी (दि. ३० ऑक्टोबर) खरे क्लब हाऊस, धामणी रोड, सांगली येथे भव्य आणि उत्साहपूर्ण वातावरणात सार्वजनिक नागरी सत्कार करण्यात आला. वास्तुकला विषयातील पीएच.डी. पदवी संपादन केल्याच्या निमित्ताने आयोजित या सोहळ्यात त्यांच्या बहुआयामी कार्यकर्तृत्वाचा गौरव करण्यात आला.
या समारंभासाठी संजय घोडावत विद्यापीठाचे कुलगुरू प्रा. डॉ. उद्धव भोसले, इंडियन इन्स्टिट्यूट ऑफ आर्किटेक्ट्सचे माजी राष्ट्रीय अध्यक्ष आर्किटेक्ट विलास अवचट, विश्वस्त आर्किटेक्ट प्रकाश देशमुख, कौन्सिल सदस्य आर्किटेक्ट राजीव तायशेटे आणि कौन्सिल ऑफ आर्किटेक्चरचे सदस्य आर्किटेक्ट निलेश चव्हाण आदी मान्यवरांना निमंत्रित करण्यात आले होते.
सांगली जिल्हा संघर्ष समिती आणि डॉ. रविंद्र चव्हाण यांचे कार्य हे लोकहितासाठीच्या संघटित संघर्षाचे प्रभावी उदाहरण ठरले आहे. समितीने गेल्या अनेक वर्षांपासून भ्रष्टाचार, निकृष्ट सार्वजनिक बांधकामे, अनधिकृत बांधकामे, पाणीपुरवठा, रस्ते, स्वच्छता, पर्यावरण संरक्षण आणि नागरी सुरक्षितता या प्रश्नांवर सातत्याने आवाज उठविला आहे. आंदोलने, माहिती अधिकार, प्रशासकीय पाठपुरावा आणि न्यायालयीन लढ्यांद्वारे समितीने सर्वसामान्य नागरिकांच्या हक्कांसाठी संघर्ष केला आहे.
या कार्यात डॉ. रविंद्र चव्हाण यांनी वास्तुकला, अभियांत्रिकी, नगररचना आणि कायद्याच्या ज्ञानाच्या आधारे समितीच्या विविध लढ्यांना भक्कम तांत्रिक व कायदेशीर आधार दिला आहे. भ्रष्टाचारविरोधी कारवाया, बोगस वास्तुविशारदांविरोधातील लढा, बांधकाम परवानग्यांमधील अनियमितता उघडकीस आणणे, पर्यावरण संरक्षण आणि सार्वजनिक हिताच्या याचिका यामध्ये त्यांनी महत्त्वपूर्ण भूमिका बजावली आहे.
डॉ. रविंद्र चव्हाण हे दयानंद कॉलेज ऑफ आर्किटेक्चर, लातूरचे प्राचार्य असून स्वामी रामानंद तीर्थ मराठवाडा विद्यापीठाच्या वास्तुकला अभ्यास मंडळाचे अध्यक्ष म्हणून त्यांनी कार्य केले आहे. बी.ई. (सिव्हिल), बी.आर्क., एलएल.बी., एम.आर्क. आणि पीएच.डी. अशा विविध पदव्या संपादन केलेल्या डॉ. चव्हाण यांनी हैदराबाद येथील जवाहरलाल नेहरू आर्किटेक्चर अँड फाइन आर्ट्स युनिव्हर्सिटीमधून वास्तुकला विषयात डॉक्टरेट प्राप्त केली आहे. हवामानानुकूल वास्तुरचना, नैसर्गिक वायुवीजन, ऊर्जा बचत आणि पर्यावरणपूरक इमारती या क्षेत्रातील त्यांचे संशोधन उल्लेखनीय आहे.
या भव्य सोहळ्याच्या यशस्वी आयोजनामागे सांगली जिल्हा संघर्ष समितीचे नियोजन, संघटनकौशल्य आणि कार्यकर्त्यांचे अथक परिश्रम विशेष उल्लेखनीय ठरले. निमंत्रण व्यवस्था, मान्यवरांचे स्वागत, व्यासपीठ नियोजन, सत्कार आणि उपस्थितांची व्यवस्था या सर्व बाबी समितीच्या कार्यकर्त्यांनी अत्यंत शिस्तबद्ध पद्धतीने पार पाडल्या. त्यामुळे हा समारंभ केवळ एका व्यक्तीच्या सन्मानापुरता मर्यादित न राहता सामाजिक संघर्ष, लोकशक्ती आणि समाजसेवेचा गौरव करणारा संस्मरणीय सोहळा ठरला.
सत्काराबद्दल कृतज्ञता व्यक्त करताना डॉ. रविंद्र चव्हाण यांनी समाजातील अन्याय, भ्रष्टाचार, पर्यावरणाचा ऱ्हास आणि सामान्य नागरिकांच्या हक्कांसाठी सांगली जिल्हा संघर्ष समितीच्या सहकार्याने भविष्यातही आपला संघर्ष अखंड सुरू ठेवण्याचा निर्धार व्यक्त केला.
सांगली जिल्हा संघर्ष समितीची संघटनशक्ती आणि डॉ. रविंद्र चव्हाण यांचे ज्ञान, अनुभव व समाजसेवेची बांधिलकी यांचा प्रेरणादायी संगम या नागरी सत्कार सोहळ्यातून अधोरेखित झाला.
यावेळी सत्कार समितीचे तानाजी रुईकर नितीन चव्हाण सतीश साखळकर शंभूराज काटकर राजू अहिवळे अमित शिंदे आर्किटेक पृथ्वीराज पवार ज्योतीराम माळी शितल निंबीकाई यांच्यासह मोठ्या संख्येने नागरिक उपस्थित होते.