नाशिक तालुक्यावर शासनाचा अन्याय! पाणी हक्काचे असूनही शेतकरी संकटात; नाशिक तालुक्याचा दुष्काळग्रस्त यादीत समावेश करण्याची शेतकऱ्यांची जोरदार मागणी
नाशिक:
नाशिक तालुक्यात यंदा अत्यल्प पाऊस पडल्यामुळे शेती पिकांचे अतोनात नुकसान झाले असून संपूर्ण तालुका भीषण दुष्काळाच्या छायेत आहे. असे असतानाही राज्य शासनाने जाहीर केलेल्या दुष्काळग्रस्त तालुक्यांच्या यादीतून नाशिक तालुक्याला वगळल्यामुळे स्थानिक शेतकऱ्यांमध्ये तीव्र संतापाची लाट पसरली आहे. शासनाच्या या धोरणामुळे नाशिक तालुक्यातील बळीराजावर मोठा अन्याय होत असल्याचा आरोप वंजारवाडी येथील शेतकरी गोरख भीमराव सामोरे यांनी केला आहे.
हक्काचे पाणी दुसऱ्या तालुक्यांना, स्थानिक शेतकरी पाण्यासाठी वंचित!
नाशिक तालुक्यातील धरणांमधील पाणी इतर दुष्काळी तालुक्यांसाठी राखीव ठेवले जाते आणि नदीपात्रात सोडले जाते. मात्र, ज्या दिवशी इतर तालुक्यांसाठी पाणी सोडले जाते, त्याच दिवशी नाशिक तालुक्यातील वीज पुरवठा खंडित (वीज कपात) केला जातो. त्यामुळे धरणांतून वाहून जाणाऱ्या पाण्याचा स्थानिक शेतकऱ्यांना अजिबात उपयोग होत नाही. वीज नसल्याने पिकांना पाणी देता येत नाही आणि शेकडो एकर शेतजमीन पडीक ठेवावी लागत आहे.
सोयाबीन-भात जळाले, चाऱ्याचा गंभीर प्रश्न
यंदाच्या पावसाळ्यात योग्य वेळी पाऊस न पडल्याने सोयाबीनचे पीक हातात येण्यापूर्वीच वाळून गेले आहे, तर भात पिकाचीही तीच अवस्था झाली आहे. दुष्काळी परिस्थितीमुळे यंदा वाळलेला चाराही उपलब्ध नाही आणि हिरवा चारा पिकवणे अशक्य झाले आहे. यामुळे पशुपालक व शेतकरी यांच्यापुढे जनावरांच्या चाऱ्याचा आणि पिण्याच्या पाण्याचा गंभीर प्रश्न निर्माण झाला आहे.
जनप्रतिनिधींच्या भूमिकेवर प्रश्नचिन्ह; फक्त एकाच आमदाराचा लढा
तालुक्यातील शेतकरी संकटात असताना केवळ देवळाली मतदारसंघाच्या आमदार सरोज ताई अहिरे या प्रश्नावर हिरीरीने लढा देताना दिसत आहेत. मात्र, तालुक्यातील उर्वरित तीन आमदार या गंभीर समस्येवर पूर्णपणे ‘मूग गिळून गप्प’ बसले आहेत. लोकप्रतिनिधींच्या या उदासीन आणि लाजिरवाण्या भूमिकेमुळे तालुक्यातील शेतकरी वर्गात तीव्र नाराजी व्यक्त केली जात आहे.
दुय्यम वागणूक थांबवा, तत्काळ दुष्काळ जाहीर करा!
"नाशिक तालुक्यातील शेतकऱ्यांना शासनाने दुय्यम वागणूक देणे थांबवावे. तात्काळ नाशिक तालुक्याचा दुष्काळग्रस्त यादीत समावेश करून शेतकऱ्यांना पिक विमा, कर्जमाफी आणि आर्थिक मदत द्यावी," अशी आक्रमक मागणी वंजारवाडीचे शेतकरी गोरख भीमराव सामोरे यांनी मुख्यमंत्री श्री. देवेंद्र फडणवीस यांच्याकडे पत्राद्वारे व निवेदनाद्वारे केली आहे.
- गोरख भीमराव सामोरे (शेतकरी, वंजारवाडी, नाशिक तालुका)