नांदेड:- वाढदिवसावर होणारा अनावश्यक खर्च टाळून तोच वेळ आणि निधी सामाजिक व शैक्षणिक कार्यासाठी देण्याचा एक स्तुत्य पायंडा भायेगावचे बालाजी पाटील भायेगावकर यांनी पाडला आहे. त्यांचा वाढदिवस नुकताच विविध सामाजिक उपक्रम राबवून अत्यंत अनोख्या पद्धतीने साजरा करण्यात आला. या सर्व लोकोपयोगी उपक्रमांची सुरुवात गावातील ग्रामदैवताचे दर्शन आणि आशीर्वाद घेऊन करण्यात आली.
यानिमित्ताने भायेगाव येथील जि. प. हायस्कूल आणि अंगणवाडीमध्ये विशेष कार्यक्रमाचे आयोजन करण्यात आले होते. यावेळी विद्यार्थ्यांची गैरसोय टाळण्यासाठी त्यांना बसण्याकरिता मॅट देण्यात आले, तसेच सर्व बालकांना व विद्यार्थ्यांना खाऊचे वाटप करण्यात आले.
पर्यावरणाचा समतोल राखण्याच्या उद्देशाने गावामध्ये व्यापक स्तरावर वृक्षारोपण मोहीम राबवण्यात आली. जि. प. हायस्कूल, अंगणवाडी, प्राथमिक आरोग्य केंद्र, गावची स्मशानभूमी आणि सिडकोतील जिजामाता कॉलनी परिसरामध्ये वृक्षारोपण करण्यात आले. नुसती झाडे लावून न थांबता, लावलेल्या सर्व वृक्षांच्या संवर्धनासाठी त्यांना सुरक्षित कुंपणही बसवण्यात आले, ज्याचे ग्रामस्थांमधून विशेष कौतुक होत आहे.
या लोकोपयोगी उपक्रमाप्रसंगी गावातील प्रतिष्ठित नागरिक मोठ्या संख्येने उपस्थित होते. यामध्ये प्रामुख्याने तंटामुक्ती अध्यक्ष त्र्यंबक कोल्हे, पोलीस पाटील सदानंद कोसडे, उपसरपंच बालाजी कोल्हे, ग्रामपंचायत सदस्य गौतम भालेराव, आनंद मेकाले, तसेच पांडुरंग पाटील, मारुती पाटील, भानुदास कोल्हे, देवराव कोल्हे, एकनाथ कोसडे आणि उत्तम कोल्हे यांनी उपस्थित राहून या विधायक कार्यास हातभार लावला.
बालाजी पाटील भायेगावकर यांच्या या सामाजिक कार्याची दखल घेत राजकीय व सामाजिक क्षेत्रातील अनेक मान्यवरांनी त्यांना भावी वाटचालीसाठी भरभरून शुभेच्छा दिल्या. नांदेड दक्षिणचे आमदार आनंदराव पाटील बोंढारकर, शिवसेनेचे दक्षिण अध्यक्ष विनय गिरडे, तुलजेस यादव, पैलवान विठ्ठल पाटील मोरे, सुहास पाटील खराणे आदीनी प्रत्यक्ष भेटून तसेच भ्रमणध्वनीवरून त्यांना वाढदिवसाच्या हार्दिक शुभेच्छा दिल्या.याशिवाय नातेवाईक आणि मित्रमंडळींनीही त्यांच्या राजकीय व सामाजिक वाटचालीस उदंड यश मिळो,अशी सदिच्छा व्यक्त केली.