अहिल्यानगर| प्रतिनिधी :
जामखेड तालुक्यात अवैध दारूविक्रीविरोधात स्थानिक गुन्हे शाखेने (एलसीबी) मोठी कारवाई करत १ लाख ६८ हजार रुपयांची देशी दारू जप्त केली आहे. शहर हद्दीत गुप्त माहितीच्या आधारे टाकलेल्या छाप्यात मोठ्या प्रमाणात देशी दारूचा साठा आढळून आला असून संबंधित आरोपीला ताब्यात घेण्यात आले आहे.
अवैधरीत्या साठवणूक करून दारू विक्री केली जात असल्याची खात्रीशीर माहिती मिळाल्यानंतर एलसीबीच्या पथकाने नियोजनबद्ध कारवाई करत सदर छापा टाकला. छाप्यात देशी दारूचे अनेक बॉक्स जप्त करण्यात आले असून जप्त मालाची किंमत सुमारे १,६८,००० रुपये असल्याचे पोलिसांनी सांगितले.
सदर कारवाई पोलीस अधीक्षकांच्या मार्गदर्शनाखाली करण्यात आली असून आरोपीविरोधात महाराष्ट्र दारूबंदी कायद्यान्वये गुन्हा दाखल करण्यात आला आहे. जामखेड तालुक्यात अवैध दारूविक्रीमुळे कायदा-सुव्यवस्थेचा प्रश्न निर्माण होत असून, अशा कारवायांमुळे गुन्हेगारी प्रवृत्तीवर आळा बसणार आहे.
दरम्यान, तालुक्यात अवैध दारूविक्री, वाहतूक व साठवणूक करणाऱ्यांवर यापुढेही कठोर कारवाई करण्यात येणार असल्याचा इशारा पोलिसांनी दिला आहे.