मुंबईतील लोअर परेल भागात विनस सारख्या प्रतिष्ठित कंपनीचं बनावट फेस मास्क विकलं जात आहे. तसेच याच भागात या प्रतिष्ठित कंपन्यांच्या फेस मास्कचा मोठा साठा देखील असल्याची माहिती पोलिसांना मिळाली आहे. पोलिसांनी टाकलेल्या छाप्यात सुमारे 22 लाख रुपयांचे बनावट मास्क जप्त करण्यात आले आहेत. मात्र, हा साठा म्हणजे बनावट फेस मास्कच्या हिम नगाचा एक छोटासा भाग असल्याची माहिती पोलिसांना तपासादरम्यान समोर आली आहे. कारण हे बनावट मास्क बनवणारा एक मोठा कारखानाच आहे. या कारखान्यातून देशभरात कोट्यावधी रुपयांचे बनवाट मास्क पुरवले जात असल्याची धक्कादायक माहिती पोलिसांना मिळाली आहे.

बनावट फेस मास्क प्रकरणी मुंबई पोलिसांनी सफदर हुसेन याला मुंबईतून तर मोहम्मद सोहेल याला उत्तर प्रदेश राज्यातील गाझीयाबाद येथून अटक केली आहे. तर N95 हे V-4400, NIOSH, TC-84A- 8126, N95 vlk VENUS या कंपन्यांचे बनावट लोगो, बनावट मास्क, मास्क करता लागणारे प्लास्टिक आणि दस्ताऐवज पोलिसांनी जप्त करुन बनावट मास्क बनवणारा कारखाना सील केल्याची माहिती मुंबई पोलीस जन संपर्क अधिकारी एस चैतन्य यांनी दिली आहे.

उत्तर प्रदेश येथून अटक केलेल्या मोहम्मद सोहेल हा या घोटाळ्याचा मुख्यसुत्रधार आहे ज्याचा शोध मुंबई पोलिस गेली कित्येक महिन्यांपासून करत होती. तर देशभरातील अनेक मोठं मोठे फेस मास्क डिलर आणि मेडीकलवाले हे सोहेलच्या संपर्कात होते. ज्यांची चौकशी आता मुंबई पोलिस करणार आहेत. ज्यामुळे सामान्य माणसांच्या जीवाशी खेळणारे गजाआड होतील आणि कोट्यावधींचा घोटाळा उघडकीस येईल. मुंबई पोलिस गुन्हे शाखा क्रमांक 3 चे प्रभारी पोलिस निरीक्षक अशोक खोत, पोलिस निरीक्षक नितिन पाटील, सपोनि गजानन भारती, पोलिस नाईक शिवाजी जाधव, पोलिस शिपाई भास्कर गायकवाड यांनी ही धडकेबाज कामगिरी केली आहे.